Ruwan Hettiarachchi Exclusive from Starfriends.lk
රුවන් හෙට්ටිආරච්චි (Ruwan Hettiarachchi) අලුත් අවුරුද්දේ අලුත්ම වෙනසකින් වැඩ ආරම්භ කරලා තියෙනවා. කවුරුත් බලාපොරොත්තු නොවුණ විධියට ඒ වෙනස කමනීය වෙනසක් බවත් කියන්නම අවශ්‍යයි. රුවන්ගේ අලුත්ම ගීතය නම් කරලා තියෙන්නේ ˝කමනීය˝ කියලා. සැල්ලුවෙන් සන්සුන්ව හිතේ හැටියේ විඳින්න පුළුවන් ආකාරයට මෙම ගීතය නිර්මාණය වෙලා තියෙනවා. හැබැයි ගීතයෙන් කියවෙන්නේ නම් සැනසීම අහිමි වීමක් ගැන. ආදරයේ විරහවක් ගැන. විරහ වේදනාව සංයමයෙන් රසවිඳින්න හැකි වටපිටාවක් රුවන් නිර්මාණය කර දෙනවා. කමනීය ගිතයේ මියුසික් වීඩියෝව නම් තවමත් නිර්මාණය වෙලා නැහැ. කොහොම වුණත් ෆෙස්බුක් ලයිව් එන්න ටිකක් කම්මැලිකම් කරන රුවන් කමනීය වෙනස ගැන කියන්න ලයිව් ආවා.
සුසුමක් වැදී
කුසුමක් සැලී
සුවඳක් ලිහී
ඉහිරී ගියේ
දැනී දැනේ… හැඟුම් ලයේ
කමනීය ආදරණීය හීනයක්ම වූ
මරණීය හාදු දිදී මුවේ විසක් තියූ
රැවටීම ආදරයේ සැබෑ මගයි කියූ
සැනසීම ජීවිතයේ කතා පොතෙන් වැසූ
එහෙම තමයි මේ අපූරු ගීතය ගලාගෙන යන්නේ. ආදර ගීත වලදී මෙතෙක් හමු නොවූ සුන්දර උපමාරූපක ද මෙම ගීතයේ දකින්න ලැබෙනව බව සම්පූර්ණ ගීතය ඇදුවොත් ඔයාලට දැකගන්න ලැබේවි. Kapilan Kugavel තමයි මෙම ගීතයේ සංගීත නිර්මාපකයා. Himali N Liyanage සමඟ රුවන් නිර්මාණයකට සම්බන්ධවී තියෙන්නේ පළමුවතාවට බවත් ඔහු හෙළිකරනවා. ඇය මෙම පද වැල මනරම්ව නිර්මාණය කර තිබෙනවා.
මල්හාර තනුව අසාලා
වැගිරේවි කඳුළැලි වර්ෂා
ගංඟාව ශෝකයෙන් පිරේ
වේදනාව හංඟා
උන්මාදයෙන් වෙලීලා
හේතුවක් නොදන්නා
මේ ප්‍රේමයේ තරංගා
දැන් ඔයාලාට මේ ගීතය යූටියුබ් එකෙන් රසවිඳින්න පුළුවන්. ඒ වගේම ගීතය ගැන අවංකම හැඟීම රුවන්ට කියන්නත් පුළුවන්.
Ruwan Hettiarachchi Exclusive from Starfriends.lk
