මනුරංගගෙන් නාඩගමක් නැති නාදගමක් – මනුරංග විජේසිංහ

මුල්ම කාලයේ මනුරංගව මිනිස්සු දැනගෙන හිටියේ සින්දු ලියන කොල්ලෙක් විදියට. ඒවා බැනුම් අහන සිංදු. මිනිසුන්ගෙන් බැණුම් අහගෙනම මනුරංග තව තවත් සිදු ලියන්න පටන් ගත්තා. ඒවටත් බැන්නා . ඒ වුණාට මනුරංග ආයෙමත් ලිව්වා. එතනින් පස්සේ මනුරංග විවිධ පැතිකඩවල් හොයාගෙන ගියා. ඒ හැම තැනදිම කරන්න පුළුවන් උපරිම දේ කරලා තමයි මනුරංග නතර වුණේ. ඉතින් ආපහු හැරිලා බලද්දි මනුරංගට සතුටු වෙන්න පුළුවන් එයා ආපු ගමන ගැන. ඉතින් ඊටත් වඩා සතුටු වෙන්න පුළුවන් මනුරංගට බැනපු අයට

කොහොමද ජීවිතේ?
ජීවිතේ වරදක් නෑ නියමෙටම තියෙනවා.

ඒ කියන්නේ මුකුත් අවුලක් ඇත්තේම නෑ?
අප්‍රේල් මාසේ වුන සිද්ධියත් එක්ක ලංකාව නම් අමාරුම කාලයක් තමයි පහු කරමින් යන්නේ. ඒක නිසා මිනිස්සුන්ට හරිම අමාරු කාලයකට මුහුණ දෙන්න සිද්ධ වුණා.

මනුරංග දැන් සින්දු ලියන්නෙ නැද්ද ?
ඇයි නැත්තෙ ඒවා ඒ විදියටම සිද්ධ වෙනවා. කරපු සින්දු ටිකකුත් එළියට දාන්න බලාපොරොත්තුවෙන් ඉන්නේ.

බලාපොරොත්තුවක් තියෙනවා කිව්වට ඉතින් එහෙම ආරංචියක්වත් නෑනේ?
රටේ තිබුණු වාතාවරණයත් එක්ක සින්දු එලියට දාන එක පරක්කු කළා. මොකද මිනිස්සුන්ට සින්දු අහන්න තරම් හරිහමන් පරිසරයක් ලංකාව ඇතුලේ තිබුනේ නෑ. ඒකයි ඒ දේවල් පස්සට දැම්මෙ. දැන් හරි ටික ටික ඉස්සර වගේම රට යථා තත්ත්වයට පත් වීගෙනයි එන්නේ. ඒක නිසා හෙට අනිද්දම කරපු සින්දු ටික රිලීස් කරලා දානවා.

කවුද මේ Artist ලා?
ලහිරු ,උමාරියා, සනුක,මිහිඳු මේ සෙට් එකට තමයි සින්දු කරලා තියෙන්නේ.විෂුවල් පවා කරලා තියෙන්නෙ. ඉස්සරහට බලාගන්න පුළුවන් මේ සින්දු ටික කොහොමද කියලා. සින්දු වැඩේ එහෙම කරගෙන යනකොට තවත් පොඩි වැඩක් කරගෙන යනවා.

පොඩි වැඩක් කිව්වේ?
මේ දවස්වල YouTube චැනල් එකක් කරගෙන යනවා. Not out with Manu කියලා. ඒක තමයි වැඩේ හැබැයි තව ලොකු වැඩකුත් තියෙනවා.

පොඩි වැඩ ලොකු වැඩ ඔක්කොම එකට නේද?
ඔව්, ඔව්…මේක හරියටම කියනවනම් පැදුරු සාජ්ජයක් වගේ වැඩක් තමයි. තනිකරම සින්දුත් එක්ක මේක යන්නේ. අපි මේක හඳුන්වලා දීලා තියෙන්නෙ නාද ගම කියලා . හැබැයි ඒ වුණාට ඒක නාඩගමක් නං නෙවෙයි. Sing කරන පස් දෙනෙක් ඉන්නවා. මේක ticket ෂෝ එකක් දැනට අපි show හතරක් කරලා තියෙනවා. එහෙම වුණාට කවුරු කොහොම කිව්වත් අපි මේකට ගන්නෙ හරියටම 500- 600ක් වගේ ක්‍රවුඩ් එකක්. ඊට වඩා වැඩිපුර ගන්නේ නෑ. එහෙම උනාම මිනිස්සුන්ට රසවින්දනයට බාධාවක් වෙන්නෙත් නෑ.

නාදගමට තියෙන ප්‍රතිචාර එහෙම කොහොමද ?
ප්‍රතිචාරනම් අති ඉහලයි. අපේ ඊළඟ ප්‍රසංගය තියෙන්නේ මෙල්බන් වල. ඔක්තෝබර් 13 වෙනිදා. දිගටම මේ ප්‍රසංගයත් කරන්න තමයි අපි බලා පොරොත්තු වෙන්නෙ.

මෑතකදි මනුරංග journalist කෙනෙකුත් වෙලා හිටියා නේද?
ඔව් ඔව් ටික දවසක දවසක ඉඳන් මම පත්තරේකට ඉන්ටර්විව් එකක් කරනවා. දැන් නෙවෙයි මිට කාලෙකට ඉස්සෙල්ලාත් මම කොලම් ලිව්වා.

ඒ වුණාට කතා කරන්නම ඕන දේ පස්සට ගියා. සිරස ටීවි එකේ “සුලං කුරුල්ලෝ’?
ඔව් ඒක ඇත්තට ම අපූරු වැඩසටහනක්. ගිය අවුරුද්දේ රයිගම් ටෙලි සම්මාන උළෙලේදී වසරේ හොඳම සංගීත වැඩසටහනට හිමි සම්මානයත් ලැබුණා. ඒකෙ දැන් ප්‍රෝග්‍රෑම් සෑහෙන ගණනක් කරලයි තියෙන්නෙ. මේක ජනතාව අතරට ගිය වෙනස්ම මාදිලියෙ වැඩසටහනක්. හරියටම කියනවා නම් ප්‍රවීණ පරපුරත් අලුත් පරපුරත් එකතු කරන වැඩසටහනක් කියලා කිව්වොත් ඒක හරි.

step-by-step ඇවිල්ලා අන්තිමේදී මනුරංග රේඩියෝ එකටත් අත තිබ්බා නේද?
ඔව් ඒක නං අලුත්ම අත්දැකීමක්. මගේ මුල්ම ගුවන්විදුලි නාට්‍ය රචනය තමයි ආදර වෙඩිල්ල. මේකට ලොකු cast එකක් ඉන්නවා. තුමිඳු දොඩන්තැන්න, හිමාලි සයුරංගි, සරත් කරුණාරත්න, උමයංගනා, රම්‍යා වනිගසේකර, නෙතලි නානායක්කාර මේ හැමෝම එකට සම්බන්ධ වෙනවා. තුමිඳු සාමාන්‍යයෙන් නිර්මාණවලට සම්බන්ධ වෙන්නේ ගොඩක් අඩුවෙන්. ඒත් ඔහු ආදර වෙඩිල්ල එක්ක එකතු වුනා.