Michelle Dilhara Exclusive from Starfriends.lk
මුලින්ම අපි කතා කරමු දිල්හාරාගේ සුදු ඇඳගෙන කළු ඇවිදින් ඩ්‍රාමා එක ගැන?
ප්‍රතිචාර ගොඩක් හොඳයි. ඇත්තටම මේ ටෙලිනාට්‍යය මගේ කලා ජීවිතේ හැරවුම් ලක්ෂයක් කියලා කිව්වොත් හරි. මම රංඟනයේ යෙදුණ ටෙලි නාට්‍යවලට වඩා වෙනස්ම නාට්‍යයක්. අනික මේ නාට්‍යය මෙගා නාට්‍යයක් නෙමෙයි. මම කරන්නේ අයෝමා කියන චරිතය. මේ නාට්‍යයට audition කරද්දී රඟපාලා තිබුණේ සල් සපු නා ටෙලිනාට්‍යයේ විතරයි. විශේෂයෙන්ම මට ආසාවක් තිබුණා මගේ රංඟන දිවියේ මම නොකරපු ආකාරය සහ කවුරුත් නොදුටු ආකාරයේ රංගන ශෛලියක් ඔප් නංවන්න පුළුවන් අධ්‍යක්ෂවරයෙක් යටතේ වැඩ කරන්න. ඇත්තටම ඒ ආශාව සඵල වුණා සුනිල් සර් එක්ක වැඩ කරන්න ලැබීමත් එක්ක.
සුනිල් කොස්තා සර් කියන්නේ ලංකාවේ ජනප්‍රියම ටෙලිනාට්‍ය රාශියක් අධ්‍යක්ෂණය කරපු සම්මානලාභී ප්‍රවීණ අධ්‍යක්ෂවරයෙක්. ඉතින් ඔහුත් එක්ක වැඩ කරන්න ලැබීම භාග්‍යයක්. ඒ විතරක් නෙමෙයි මගේ වටා රඟපාන අනිත් නළු නිලියනුත් ඉතාමත් දක්ෂ සම්මාන ලාභී නළු නිළියන් ඉන්නේ. මගේ අම්මට රඟපාන්නෙ උමයංගනා අක්කා, ඒ වගේම චාන්දනී සෙනවිරත්න අක්කා, නිරෝෂනී ජයසිංහ, වීනා ජයකොඩි වගේ අති විශිෂ්ට නළු නිළියන් රැසක් රංඟනයේ යෙදෙනවා. මුලින්ම නම් මට බයක් තිබුණා ඒ වගේ ප්‍රවීණ අයත් එක්ක රංඟනයේ යෙදෙද්දී මේක මට පුළුවන් වෙයිද කියලා. නමුත් අධ්‍යක්ෂවරයා වගේම මාත් එක්ක රංඟනයේ යෙදුණ අනිත් නළු නිළියන්ගෙන් පවා ලොකු සහයක් ලැබුණා ” අයෝමා” කියන චරිතය සාර්ථකව ගොඩ නංවා ගන්න.
අයෝමා කියන චරිතය ඔයා කරපු අනෙක් චරිතයන්ට වඩා හාත්පසින්ම වෙනස්. ඒ චරිතය ගැනත් මතක් කිරීමක් කරමු?
මේ කතාව ගොඩක් තැන් වලදි හරි සංවේදීයි. දෙබස් වුනත් දෙබස් බොහෝමයක් අඩුයි. නමුත් ලොකු කතාවක් මේ තුලින් කියවෙනවා. අයෝමා කියන චරිතය ගත්තොත් ඇයට අම්මා විතරයි ඉන්නේ. තාත්තා නැහැ කියලා හිතුවට තාත්තා ඉන්නවා. ඔහුව හොයාගෙන අම්මත් එක්ක යන ගමන ගැනයි මේ කතාවෙන් කියවෙන්නේ. තනිවුන ගැහැණු දෙන්නෙකුට සමාජයෙන් එන ප්‍රශ්න ගැටළු වලට මුහුණ දෙන ආකාරය මේ කතාවෙන් පෙන්වනවා. වර්තමාන සමාජයේ බොහෝ ප්‍රශ්න ගැන කතා කරන නාට්‍යයක්
මිෂෙල් ඉන්න බොහෝ ටෙලිනාට්‍යවල දී ප්‍රවීණ නළු නිළියන් සමඟ වැඩ කරන්න ලැබෙනවා. ඒ ගැන මොකද හිතන්නේ?
මේ වෙනකන් මම රඟපාපු සියලු ටෙලි නාට්‍යවලදී මට වෙනස් භූමිකාවන් රඟපාන්න අවස්ථාව ලැබුණා. ගුරුවරියක්, අවුරුදු15ක් සහ 16ක ගැහැනු ළමයකුගේ චරිතයක්, වගේ වෙනස් වෙනස් ආකාරයෙන් චරිත් ලැබුණා. ඒ චරිත සමහර අවස්ථාවලදී මට අභියෝගයක් වුනා. බෝධි කියන නාට්‍යයේදී මම රඟපෑවේ කාලි යක්ෂණියගේ චරිතය. ඒ වගේ මට චරිත ලබුනේ අභියෝගයක් එක්ක. මේ හැම දේකින්ම මට ඉගෙන ගන්න දෙයක් තිබුණා. විශේෂයෙන්ම චාන්දනී අක්කා සහ උමයංගනා අක්කා සමහර තැන්වලදි ළඟටම ඇවිල්ලා අම්මා කෙනෙක් වගේ කියලා දෙනවා. ඒ වගේ ලොකු සහයෝගයක් ලැබෙනවා. ඒ නිසාම තමයි ඒ ඒ චරිතවලට සාධාරණයක් ඉෂ්ට කරන්න මට පුළුවන් වුණේ.
මෑතකදී ජාත්‍යන්තර සම්මානයක් ලැබුණා. ඒ ඔයා කරන සමාජ සේවාවන් වෙනුවෙන්?
දකුණු ආසියාතික රටවල් වල සහභාගිත්වයෙන් තමයි මෙ සම්මාන උළෙල පැවැත්වෙන්නේ. එතනදි සමාජ සේවා කරන අය අතරින් කණ්ඩායම් නායකයින් තෝරනවා ඒ අතරට මමත් තේරුණා. ඉතින් ඒ සම්මාන උළෙලේදී මටත් සම්මානයක් හිමි වුණා .
කලාකරුවකු හෝ කලාකාරිනියක සමාජ සේවය සඳහා යම් යම් දේ කරද්දී කාටහරි කියන්න පුළුවන් ජනප්‍රියතාවය වෙනුවෙන් මේ සමාජ සේවා කටයුතු කරනවා කියලා. ඇත්තටම ජනප්‍රියතාවය වෙනුවෙන් ද මේ සමාජ සේවා කටයුතු කරන්නේ?
අපොයි නැහැ. ජනප්‍රියත්වය රැක ගන්න කරානම් මම නිළියක් වුණාට පස්සේ ඒ දේවල් කරන්න පටන් ගන්නවා.හැබැයි මම වයස අවුරුදු 15 ඉඳලා සමාජ සේවා කටයුතු කරන්න පටන් ගත්තේ. ඒ කියන්නේ කලාවටත් එන්න කලින් ඉදල. මම නිලියක් නිසා තමයි දැන් ඔය කතාව කිව්වොත් කියන්නේ.
මිෂෙල්ට කලාව වෙනුවෙන් සම්මාන ලබා ගැනීමේ ආසාවක් තියෙනවද?
ඒක අපිට විතරක් සීමා වුණ දෙයක් නෙමෙයි. හැම වෘත්තියකම යෙදිල ඉන්න හැමෝගෙම සිහිනයක්. ඒ දෙය ලබාගන්න නම් කැපවීමෙන් කරන දෙය කළ යුතුයි. එහෙම කැපවීම් කරනවා නම් අපටත් ඒ දෙය බලාපොරොත්තු වෙන්න පුළුවන්.
මිෂෙල් දිල්හාරා කියන්නේ මේ වෙද්දි වෘත්තීමය නිළියක් ද?
ඔව් රංගනය තමයි මගේ දැන් වෘත්තීය.
සිනමාවට ඔබේ තියන ලැදියාව මොන වගේද?
සිනමාව පැත්තෙන් වැඩ පටන් ගන්න හිටියේ නමුත් මේ ප්‍රශ්නත් එක්ක පොඩ්ඩක් ඒ දේවල් කල් ගියා. ඉදිරියේදි ඒ කටයුතු ආරම්භ කරන්න සූදානමින් ඉන්නවා.
ලංකාවේ පවතින වාතාවරණයත්යත් එක්ක ඔබ භාරගත් නිර්මාණවල රූගත කිරීම් මේ වෙද්දි සිදු වෙනවාද?
මන්දාරම්නුවර කියන ටෙලිනාට්‍යය රූගත කිරීම් මේ වෙද්දි සිදුවෙනවා. ඒ වගේම මැයි මාසයේ මුල් ඉදලා සුදු ඇඳගෙන කළු ඇවිදින් නාට්‍යය රූගත කිරීම් ආරම්භ වුනා.
ඉදිරියේදී ඔබව දැකගන්න පුළුවන් නිර්මාණ කටයුතු ගැනත් මතක් කරමු?
දැනට සුදු ඇඳගෙන කළු ඇවිදින් කියන ටෙලි නාට්‍ය සහ තවත් නාට්‍යයක් විකාශය වෙනවා. ඊට අමතරව මන්දාරම්නුවර කියන අලුතෙන් නාට්‍යයක වැඩත් කෙරීගෙන යනවා සහ තව චිත්‍රපට දෙකක භාරගත් රූගත කිරීම් ආරම්භවීමට තියෙනවා.
Michelle Dilhara Exclusive from Starfriends.lk
