අපි ඔහු ගැන දන්නේ ගායකයෙක් කියලා. එහෙම නැත්නම් ශෙරිල් ඩෙකර්ගේ ආදරණීය ස්වාමිපුරුෂයා කියලා.
අපි නොදන්න දේවල් තව කොච්චර තියෙනවාද? මේ කියන්න හදන්නෙත් අන්න ඒ වගේ අපි නොදන්න දෙයක් ගැන.
රුවන් හෙට්ටි ආරච්චි යෞවන වියේදී පල්ලිය ඇසුරු කළ කෙනෙක්. පෞද්ගලික ජීවිතයේ මුහුණදෙන බොහෝ ප්‍රශ්නවලට ඔහු ආගමානුකූලව පිළිතුරු සොයපු කෙනෙක්. මේ පුරුද්ද නිසා අවුරුදු 20 -22 වයසෙදීම රුවන් යම් ජීවිතාවබෝධයක් එක්ක වැඩ කරන්න පටන්ගන්නවා. මනෝ විද්‍යාවට අදාල පොත පත පරිශීලනය කිරීමෙන් ද ඔහු යම් මානසික දියුණුවක් අත්පත් කරගන්නවා.
මේ නිසා රුවන් තමන්ගේ යාළුවන්ගේ බොහෝ ප්‍රශ්න වලදී මනෝ උපදේශකයකුගේ විලාසයෙන් සම්බන්ධ වෙනවා. රුවන්ගේ උපදේශනයෙන් ජීවිතය ගොඩදාගත්ත යාළුවො අදටත් රුවන්ව සිහිපත් කරන්නෙ කෘතවේදීව.
මේක අපි කෙනෙක්ගේ නොදකිනම පැත්තක්. රුවන් මේ විදියට මානසික උපදේශන සේවාව සැපයීම අදටත් නිහඬවම සිදු කරනවා. ෆේස්බුක් මාර්ගයෙන් පවා ඔහු මානසිකව කඩා වැටුණ හිත් සුවපත් කරන්න උත්සාහ ගන්නවා. ඕනම කෙනෙක් වෙනුවෙන් ඒ සේවාව නොමිලයේම ලබා දෙන්න තරම් ඔහු නිර්ලෝභීයි.
පසුගිය දවසක දසුන් නිශාන් කියන සුන්දර රංඟන ශිල්පියා අපට අහිමි වෙනවා. තමන්ට දසුන්ව මුණගැසුනා නම් මේ අවාසනාවන්ත සිදුවීම එසේ නොවනු ඇති බව රුවන් කියනවා.
කාට හරි පුළුවන් නම් තව කෙනෙක්ගේ දුකට ඇහුම්කන් දෙන්න, තව කෙනෙක්ගේ මානසික ව්‍යාධිය අස්වසන්න, ඒක ඉතා උසස් මනුෂ ගතියක්. හැමෝටම ඒ හැකියාව පිහිටන්නෙත් නැහැ. අනෙකාට ඇහුම්කන් දීමට අනෙකාව තේරුම් ගැනීමට පුදුමාකාර ඉවසීමක් අවශ්‍යයි. ඒ ඉවසීමෙන් නිහඬවම මෙහෙවරක නිරතවන රුවන් ගැන අපිට ඇතිවන්නේ අප්‍රමාණ සතුටක්.
