හොලිවුඩ් සිනමාවට බිහි වූ අති දක්ෂ රංඟන ශිල්පීන් අතර ඇමෙරිකානු රංඟන ශිල්පී විල් ස්මිත්ට හිමිවන්නේ වැදගත් තැනක්. ඔහු ගී පද රචකයෙක් වගේම නිෂ්පාදකයෙක්ද වෙනවා.
පසුගිය විසි පස් වැනිදාට තමයි විල් ස්මිත්ගේ පනස්වැනි උපන්දිනය යෙදිලා තිබුණේ. සාමාන්‍යයෙන් මේ වගේ වෙලාවට බොහෝ දෙනා කරන්නේ හොඳවැයින් සාදයක් පවත්වලා කේක් කපලා විනෝදවෙන එකනේ. හැබැයි විල් ස්මිත් ඊට වඩා වෙනස් විදියට එයාගේ අර්ධ ශතකය සමරන්න තීරණය කරනවා.
අවුරුදු පනහක් කියන්නේ ජීවිතයෙන් වැඩි කාලයක් ගෙවා අවසන් කියන එක. ඒත් විල් ස්මිත් එයාගේ ජීවිතය දිහා ධනාත්මකව බලනවා.
ඉතින් මේ වයස මුහුකුරා ගියපු නළුවා තීරණය කරනවා ඇමරිකාවේ ඇරිසෝනා ප්‍රාන්තයේ තියෙන Grand Canyon කියන කන්දෙන් පල්ලෙහාට පැනලා ජීවිතයේ පනස්වැනි වසර ස්මරණය කරන්න ඕනේ කියලා.
මේක ලේසි පහසු චැලේන්ජ් එකක් නම් නෙමෙයි. ඒත් විල් ස්මිත් ළඟ ඒ සඳහා අවශ්‍ය ආත්ම ශක්තිය ඕනවටත් වඩා තිබුණා. මේ අවස්ථාව දෑසින් දැක ගන්න විල් ස්මිත්ගේ බිරිය වගේම දරුවන් ද පැමිණ තිබුණා.
කොහොම හරි ඔහු ඉතාම සාර්ථකව මේ පිම්ම අරගන්නවා. ඒ වගේම ඊට පසුව ඉතාම ප්‍රීතිමත් උපන්දින සාදයකුත් පවත්වන්න ඔවුන් කටයුතු කරලා තිබුණා.
වයස කියන්නේ ඉලක්කමක් විතරයි. සිත තරුණව පවත්වා ගන්න පුළුවන් නම් ඕනම කෙනෙක්ට ඕනම අභියෝගයක් ජයගන්න පුළුවන්. විල් ස්මිත් පෙන්වා දුන්නේ අන්න ඒ සත්‍යය. ඉතින් ඔහුගේ මේ අභියෝගාත්මක පිම්ම ධනාත්මක ආකල්ප සංවර්ධනය කෙරෙහි වටිනා ආදර්ශයක් වනු ඇති බව තමයි අපේ විශ්වාසය.
